Aê Diê, Si Pô Ñu jing?

6. Êmuh: Aê Diê, Si Pô Ñu jing?

Wĭt lač: Ñu jing pô yuôm bhăn êdimima, êgao hĭn kơ klei mnuih drei dưi mĭn.

Aê Diê jing Mngăt Myang

A.    Knuih kơ Aê Diê

(1)   Aê Diê jing Mngăt Myang: Ñu jing myang, amâo mâo asei mlei kđeh msě mnuih ôh, kăn mâo sa mta mnỡng srăng dưi bi ghă kỡng Ñu rei.

“Aê Diê jing Mngăt Myang, leh anăn hlei pô čiăng kkuh mpŭ kơ ñu, brei kkuh mpŭ hŏng mngăt leh anăn hŏng klei sĭt nik.” (Yô han 4:24)

(2)   Ñu jing Pô Jing: Pô čŏng jing mâo hjăn Ñu pô, leh anăn ăt dôk nanao hlŏng lar.

“ Aê Diê lač kơ Y-Môis, “KÂO JING PÔ JING”, leh anăn ñu,”Brei ih lač snei kơ phung ƀuôn sang Israel,’PÔ JING tiŏ hriê kâo kơ diih’. ” (Klei Kbiă 3:14)

(3)   Aê Diê Pô Amâo Thâo Mlih ôh: Amâo mâo klei mlih ôh hlăm Aê Diê.

“Kyuadah kâo gỡ Yêhôwa amâo thâo mlih ôh; kyuanăn diih, Ơ phung anak êkei Y-Yakôp amâo rai tuč ôh.” (Malaki 3:6)

B.     Dŭm knuih Aê Diê mâo? (Knuih myang – Phẩm tính Thiên thượng)

(1)   Mâo jih klei myang: Dưi ngă jih jang mnỡng.

“Kyuadah amâo mâo ôh sa mta mnỡng Aê Diê amâo dưi ngă.” (Luk 1:37)

(2)   Thâo jih jang klei: Thâo jih djăp mta ra klei.

“Tơdah ai tiê drei kơ čŭt kơ drei. Aê Diê jing prŏng hĭn kơ ai tiê drei, leh anăn Ñu thâo jih jang mnỡng.” (I Yô han 3:20)

(3)   Dôk hlăm jih jang anôk: Hlăm sa bliữ, Aê Diê dôk hlăm jih jang anôk.

“Dưi mơh sa čô mdăm Ñu hlăm anôk hgăm tơl kâo amâo dưi buh ñu ôh? “Yêhôwa lač “Amâo djŏ hě kâo bi bŏ phung adiê wăt  lăn ala mơh?” Yêhôwa lač .” (Yêrêmi 23:24)

C.    Knuih siam Aê Diê (Knuih kpă jăk)

(1)   Doh jăk:

Tui si klei čih leh, “Brei diih jing doh jăk, kyuadah kâo pô doh jăk.” (I Pêtrôs 1:16)

(2)   Klei kpă ênô:

“Boh tâo prŏng bruă ñu jing klă, kyuadah jih jang êlan Ñu jing kpă. Aê Diê pô sĭt suôr leh anăn amâo mâo klei wê  ôh. Ñu jing kpă leh anăn djŏ.” (Klei mtô mñă klei bhiăn 32:4)

(3)   Klei khăp:

“Hlei pô amâo thâo khăp amâo tuôm thâo kral Aê Diê ôh, kyuadah Aê Diê jing klei khăp.”  (I Yô han 4:8)

(4)   Klei Sĭt suôr:

“Pô iêu diih leh dôk sĭt suôr, leh anăn Ñu yơh srăng ngă klei anăn” (I Têsalôninik 5:24)

KLEI HRIĂM ATUR KLEI ĐĂO – Khua Pô Mtô: LÊ CAO QUÝ