PÔ BI MTLAIH, KHUA YANG YÊSU KRIST

PÔ BI MTLAIH, KHUA YANG YÊSU KRIST

Êlan klăng: “Kyuadah mâo knŏng sa čô Aê Diê leh anăn knŏng sa čô Pô ti krah Aê Diê hŏng mnuih, jing Yêsu Krist, mnuih.” (I Timôthê 2:5)

PÔ BI MTLAIH, KHUA YANG YÊSU KRIST

1.     Êmuh: Hlei jing pô bi mtlaih?

Wĭt lač: Ñu jing yang tal dua hlăm Aê Diê tlâo čô yang, tơdah hriê jing mnuih, anăn Ñu pia jing: Khua Yang Yêsu Krist.

“Kyuadah hruê anei hlăm Buôn Y Đawit arăng kkiêng leh kơ diih sa čô Pô Bi Mtlaih, jing Krist Khua Yang”   (Luk 2:11)

2.     Êmuh: Anăn iêu, “Yêsu Krist” si mblang?

Wĭt lač:

-         Yêsu: čiăng mblang “Pô Bi Mtlaih”

-         Krist: čiăng mblang “Pô arăng trôč êa praĭ srăng jing Mtao.”

Snăn, Yêsu Krist si tô hmô klei mblang jing “Pô Bi Mtlaih, mtao kơ jih jang phung mtao.”

“Arăng čih ti ao jhung Ñu leh anăn tip pha Ñu sa anăn, MTAO KƠ PHUNG MTAO LEH ANĂN KHUA YANG KƠ PHUNG KHUA.” (Klei bi êdah 19:16)

3.     Êmuh: Khua Yang Yêsu jing pô mâo sĭt mỡ hlăm klei hbuê ênuk amâodah knŏng jing klei arăng duah mjing mă hlăm klei yăl dliê đưm anăn?

Wĭt lač:  Khua Yang Yêsu jing pô mâo sĭt hlăm klei yăl dliê ti lăn ala anei.

-         Yêsu jing pô phŭn hlăm jih klei hbuê ênuk kơ phung mnuih ti lăn ala anei. Klei arăng kkiêng kơ Ñu, bi mbha leh mâo dua kdrêč prŏng hlăm klei hbuê kơ phung mnuih. Jih jang klei truh hlăm klei hbuê ênuk, snăn kčưm mỡng Khua Yang Yêsu sơaĭ (Êlâo leh anăn êdei klei kkiêng kơ Khua Yang: êlâo amâodah êdei kơ Yang Krist – công nguyên  ).

-         Klei Aê Diê Blŭ jing druôm hră čih sĭt djŏ kơ Khua Yang Yêsu, hdruôm hră anei klăk klai čô mnuih ti rŏng lăn ala khăp dlăng leh anăn tŭ ư sơaĭ.

4.     Êmuh: Snăn, djŏ mỡ Khua Yang Yêsu jing sa čô hlăm phung khua prŏng(vĩ nhân) ti lăn ala anei?

Wĭt lač:   Jih jang phung khua prŏng ti lăn ala anei wăt tơdah mâo klei knhâo knhăk hĭn kơ jih jang dưn, ƀiădah ăt jing mnuih sơaĭ. Ƀiădah Khua Yang Yêsu mâo leh mỡng mphŭn dỡng leh anăn dôk mbĭt hŏng Aê Diê. Ñu jing Pô Hrih Mjing lăn adiê anei. Ƀiădah Ñu bi luă gŭ Ñu pô leh anăn kkiêng msě si mnuih drei. Kyua anăn, wăt tơdah hlei khua prŏng, khua kơ klei đăo, amâo dah wăt phung dĭng buăl jăk dưn, amâo mâo pô dưi bi msě amâo dah dưi mđơr hŏng Khua Yang Yêsu ôh.

(Yôhan 1:1-3; Philip 2:6-11; Hêbrơ 3:3)

5.     Hŏng si hdră Aê Diê brei leh Pô Bi Mtlaih?

Wĭt lač: Tui si hdră kơ Aê Diê, Pô Bi Mtlaih hriê jing mnuih kyua mỡng sa čô mniê êra, anăn gỡ H’Mari ba tian leh hŏng klei myang Yang Mngăt Jăk,leh anăn kkiêng leh kơ Ñu.

“Ně anei, sa čô mniê êra hrông srăng ba tian leh anăn kkiêng sa čô anak êkei. Ñu srăng bi anăn gỡ Êmanuel .”  Êsai 7:14

KLEI HRIĂM ATUR KLEI ĐĂO – Khua Pô Mtô: LÊ CAO QUÝ