DJĂ POIH BĔ KLEI AMA MTĂ LEH ANĂN KLEI AMĬ MTÔ

DJĂ POIH BĔ KLEI AMA MTĂ LEH ANĂN KLEI AMĬ MTÔ

“^“20Ơ dam, djă pioh klei ama ih mtă, leh anăn đăm lui ôh kơ klei amĭ ih mtô.

²¹Pioh digỡ nanao hlăm ai tiê ih, leh anăn kă digỡ ti kkuê ih.

²²Tơ dah ih êbat, digỡ srăng atăt ih; tơdah ih đih pĭt, digỡ srăng kiă kriê ih; tơdah ih srăng mdih pĭt, aigỡ srăng blŭ kơ ih.

²³Kyuadah klei mtă jing pui kđen, leh anăn klei mtô jing klei mngač, leh anăn klei buah čiăng mkra jing êlan nao kơ klei hdĭp.”

Klei Bi Hriêng 6:20-23

ami ama dôk mtô anak

Kâo buh Amĭ ama mơak snăk buh phung anak digỡ thâo gưt asăp, djă poih leh anăn ngă msĕ si klei digỡ mtô mñă leh êlâo anăn kơ phung anak digỡ. Êngao ti anăn, phung anak ba klei trŏ ênguôt êdi yơh kơ Amĭ Ama diñu, kyua klei amâo gưt asăp, klei mgao leh anăn klei ngă tă tăn jing klei amâo djŏ msĕ si klei Amĭ Ama diñu tô lač leh ôh.

Hlăm hdruôm hră, KADB Pô Bi Hriêng 6:20-21 čih:” Ơ dam, djă pioh klei ama ih mtă, leh anăn đăm lui ôh kơ klei amĭ ih mtô. Pioh digỡ nanao hlăm ai tiê ih, leh anăn kă digỡ ti kkuê ih”. Anei jing klei mñă yuôm bhăn êdimima hlăm ai tiê kâo, wăt jih jang phung ayŏng amai adei drei ăt msĕ mơh. Hlăm ai tiê kâo tăp năng, kâo ăt êmuh mơh msĕ si anei:

-         Kâo ăt djă pioh mơh hĕ klei Ama mtă, amâodah h’aĭ?

-         Kâo ăt tuôm wơr mơh hĕ klei Amĭ mtô?

-         Hlăm lam ai tiê kâo ară anei, dŭm mta kâo dôk hdơr leh anăn djă pioh klei Ama mtă wăt klei Amĭ mtô?

Snăn kâo buh hlăm kâo, ăt mâo mơh klei kâo djă pioh leh anăn ăt mâo mơh klei ka djă pioh ôh, hlăm klei Ama mtă – Amĭ mtô. Hlăm ai tiê kâo ăt mâo klei ênguôt mơh kyua klei kâo djă ka dưi ngă ênŭm ôh klei Ama mtă-Amĭ mtô anăn. Kyuanăn, dơng  mơng mông kâo thâo klei anăn truh kơ ară hĭn nei, kâo ăt djă pioh nanao hlăm ai tiê kâo dŭm mta klei Ama mtă wăt klei Amĭ mtô.

Si ngă drei čiăng pioh klei Ama mtă-Amĭ mtô?

Kâo buh, kâo mơak snăk kyua mâo Amĭ Ama thâo mtô lač. Jing kâo sa čô mnuih mâo klei bhiăn, mâo klei luă gŭ hĭn, mâo klei thâo săng lu,… Kâo mĭn jih jang phung ayŏng amai adei drei ăt msĕ mơh. Phung Amĭ Ama ăt mtô lač nanao nanao kơ drei hlăm grăp hruê-grăp mmông. Tăp năng, mmông gŏ sang dôk huă mbĭt, mmông dôk mnăm êa kafê, mmông dôk dlăng fim….

-         Ya ngă kâo mơak mơng klei anăn?

Kyua mâo klei Amĭ mtô – Ama mtă răng mgang kâo hlăm êlan kâo dôk êbat, ti anôk kâo nao leh anăn ya bruă kâo mă.

Si mtô hmô,

Amĭ lač: “Sĭt êjai ih dôk êbat ti êlan, ih êbat nah anuă hŏ ! ”.

Ama mñă: “Đăm ih hiu mă mnơng dô arăng hŏng klei h’aĭ mang ôh Dam hŏ ! ”

Kâo êmuh phung ayŏng amai adei, mâo mơh hlăm phung diih mâo Amĭ Ama mtô snei: “Ih nao tlĕ wĕ mnơng dô arăng kơ kâo”. Kâo mĭn dah, amâo mâo ôh Phung Amĭ  Ama mtô msĕ snăn h’aĭ.

Klei mtô lač, jing yuôm bhăn snăk: “Tơ dah ih êbat, digỡ srăng atăt ih; tơdah ih đih pĭt, digỡ srăng kiă kriê ih; tơdah ih srăng mdih pĭt, aigỡ srăng blŭ kơ ih.” Klei Bi Hriêng 6:22

Snăn, tơdah phung ayŏng amai adei jing leh phung Amĭ – phung Ama, brei drei gĭr mtô lač nanao nanao kơ phung anak. Čiăng kơ digỡ đăm weh hlăm klei wê, klei čhŏ mrŏ hlăm lăn ala anei ôh.

^“Kyuadah klei mtă jing pui kđen, leh anăn klei mtô jing klei mngač, leh anăn klei buah čiăng mkra jing êlan nao kơ klei hdĭp.”  Klei Bi Hriêng 6:23

Kâo buh, lu phung Amĭ Ama amâo kriăng buah ôh phung anak diñu, tơ dah digỡ mâo klei soh, mâo klei ngă mâo djŏ hŏng klei bhiăn.. Êgao ti anăn, phung Amĭ Ama lŏ h’uôn, lŏ bi mni phung anak ñu êjai digỡ dôk ngă klei amâo djŏ anăn. Anei jing klei lŏ atăt phung anak ngă klei soh êlam hĭn. Kăr anei, phung anak prŏng diñu srăng ngă klei soh prŏng mơh, hlăk anăn phung Amĭ Ama lŏ wĭt sưh, jing êgao mmông leh.

Kâo čih klei anei amâo djŏ čiăng mtô lač kơ phung ayŏng amai adei ôh, kâo čih klei anei jing klei sĭt nik kâo buh leh hlăm kâo leh anăn klei truh kơ phung anak amâo gưt asăp Amĭ Ama wăt klei Phung Amĭ Ama mdhŭ phung anak hlăm Klei soh.

Klei kâo čiăng hmang kơ Kâo leh anăn kơ phung jing amĭ ama.

-         Tal êlâo, djă pioh nanao klei amĭ mtô ama mtă.

-         Tal dua, pioh klei mtô mñă hlăm lam ai tiê. Amâo djõ ti êngao anei ôh(msĕ si Ư ư…. Čiăng knŏng mmông anăn đuč, êgao tluôn tlaih.)

-         Tal tlâo, dôk răng nanao kơ djăp mta bruă mă(dưi nơdah amâo dưi).

-         Tal pă, gir hmữ klei buah kmra mơng phung amĭ ama. (đăm đuôm ai ăl ôh, tơ dah phung amĭ ama mâo klei buah mkra kơ drei. Kyua klei anăn jing jăk kơ  drei).

-         Knal tuč, tơ dah drei jing phung amĭ ama brei drei ăt mâo msĕ snăn mơh(thâo mtô lač, klei djŏ, klei jăk, klei siam leh anăn wăt klei amâo djŏ, klei soh kơ phung anak. Sĭt digỡ mâo klei soh, klei ngă mâo djŏ brei drei mâo klei buah mkra hŏng klei djŏ hnơng.).

Pô čih: Ama Sakin